قصة خطيبي

يخطيبي كنت مستعجلة اتخطب وفعلا اتخطبت و بعد ما اتخطبت بتلت شهور بدأت تحصل مشاكل تافهة جدًا بيني وبين خطيبي ، وكنت بحُكم إني متمسكة بيه كنت بعدي وبتحمل رغم إنه كان بيقف على حاجات مينفعش إنسان طبيعي يقف عليها، لحد ما في النهاية مقدرتش أتحمل أكتر من كدا وفسخنا الخطوبة، عشان بعد اسبوع واحد بس يخطب صاحبتي (نسرين) وكانت مفاجأة غريبة بالنسبالي وغير متوقعة، هو يعرفها امتا وازاي أصلا، لحد ما وصلني الكلام اللي قهرني تمامًا وعرفت إنها شافته يوم الخطوبة بتاعتي وفضلت وراه لحد ما استجاب ليها وكانوا بيتكلموا كمان من ورايا، شوية وحبوا بعض وفسخ خطوبته معايا وخطبها هي، وللأسف مكنتش من النوع اللي بيعرف يأذي أو ينتقم، كل اللي قولته بقهر هي كلمة (حسبي الله ونعم الوكيل) قولتها وانا حاسة بأعراض ذبحة صدرية، وعدت الأيام تقيلة أوي لحد ما عرفت انهم كتبوا الكتاب وهيتجوزوا، وكلها اسبوع واتجوزوا فعلا واختفت أخبارهم تماما عني. لحد ما لقيت رقم غريب بيرن عليا، ولما رديت لقتها هي (نسرين) كانت مستغربة إني ازاي مباركتش ولا جيت فرحها، استغربت من كمية البجاحة اللي فيها بس من جوايا كنت عارفة انها مش بتكلمني عشان كدا، بتكلمني عشان مش مصدقة ان فيه شخص ممكن يتظلم ويسكت ويفوض الأمر لله، مش مصدقة إني فعلا مش هأذيها ولا هعملها حاجة، اللي زيها بتعيش قلقانة وخايفة كل ليلة وهي حاسة إن فيه حاجة غلط هتحصل في حياتها، رديت عليها ببرود وقفلت المكالمة تماما. شوية وكلمتني صاحبتنا التالتة (غادة) واقترحت عليا أشترك معاها في تطبيق من تطبيقات التداول واللي مكسبها سريع ومضمون، وعرفت انه شبه المراهنات، بتشترك في جروب والأدمن بيقولك تراهن على اي بالظبط، مين اللي هيكسب في الماتش الفلاني، توقع نهاية المسلسل الفلاني وهكذا، استحرمت الموضوع تماما وقولتلها استحالة اشترك في حاجة زي دي، لقتها بتضحك وقالتلي (هروح اقترح على صاحبتك الخاينة نسرين، هي مش عبيطة زيك وهتوافق، وخلي العبط بتاعك ينفعك) وحقيقي بعد كلامها ده قرفت منها وقفلت من الاتنين تماما بعد ما كنا أقرب تلاتة لبعض، وكلها ست شهور بس وعرفت إن (نسرين) اتطلقت، والغريب إن غادة كلمتني وحكتلي، قالتلي ان الطمع خدها وراهنت بمبالغ كبيرة من فلوس جوزها وخسرته 50 الف جنيه كانت بتسرقهم من وراه، ولما عرف طلقها، وقالتلي ربنا جابلك حقك ورني عليها واشمتي فيها، بس أنا ولا رنيت ولا كنت عايزة أشمت من الأساس. وكلها أيام وكلمني خطيبي القديم وطليق (نسرين) كلمني واعتذر وكان عايزنا نرجع لبعض وأسامحه على انه فرط فيا بالسهولة دي، بس برضه اشتريت نفسي للمرة التالتة ورفضت تماما، رفضت وقولتله اني مش هتجوزه ولو كان آخر راجل في الدنيا. واعتزلت التلاتة تماما، غادة ونسرين وطليق نسرين اللي كان خطيبي، لحد ما اتهزت المنطقة كلها بجريمة بشعة الكل كان بيحكي ويتحاكى بيها، الجريمة دي هي ان نسرين وطليقها اتفقوا انهم يقـ,ـتلوا (غادة) وفعلا استدرجوها وقـ,ـتلوها وسرقوا الدهب اللي كانت لبساه واللي اكتشفوا انه دهب صيني في الآخر، وفي النهاية وبعد سلسلة طويلة من التحقيقات ظهرت الحقيقة لكل الناس. (غادة) اتنصب عليها في تطبيق التداول والمراهنات ده زي ما غالبية الناس اتنصب عليها، بس لأن قلبها اسود قررت انها تكلمني وتكلم (نسرين) أقرب صاحبتين ليها عشان يتنصب عليهم زي ما اتنصب عليها، بس أنا طبعا رفضت واللي وافقتها في الموضوع ده كانت (نسرين) ودخلت نسرين تطبيق التداول بمبلغ صغير، شوية وكسبت ضعف المبلغ، راهنت بمبلغ أكبر وكسبت ضعفين لحد ما رصيدها وصل ل25 الف جنيه، ولما جت تسحبهم وهي طايرة من الفرح التطبيق اشترط تحط 25 الف كمان عشان يتعملها حوالة على رقم الكاش ب50 لأن ده أقل رقم بيتحول، حاولت تجيب المبلغ من كل مكان مقدرتش، فقررت تاخدهم من ورا جوزها لحد ما تاخد ال50 الف وبعدها ترد الفلوس بتاعته. بس التطبيق اتقفل مرة واحدة أول ما بعتت ال25 الف، وعرفت انه نصب، ولما كلمت غادة تتخانق معاها لقت رد غريب، غادة قالتلها ان الفلوس بتتحول عادي جدا وهي في المصيف دلوقتي من فلوس التطبيق، طبعا كانت عايزة تبرر الموقف اللي عملته فيها، وهنا الدم غلي في عروق (نسرين) وبالأخص لما جوزها عرف وطلقها، واتفاجئت كمان ان غادة بتتواصل مع طليقها عشان تستدرجه لنفسها، وفضلت ورا طليقها لحد ما قدرت تقنعه يردها وهي هترجع الفلوس وزيادة كمان. وقالتله إن صاحبتها (غادة) معاها دهب كتير وكسبت مبلغ محترم من التطبيق، كل اللي عليك تستدرجها عشان ناخد منها الدهب لأنه حقنا، ولأنها هي اللي عرفتني بالتطبيق ده، وبعدها هنصورها ونمشيها وهي مش هتقدر تفتح بقها. وفعلا جوزها اقتنع لأن الفلوس كانت فلوس شغل وكان هيتحبس لو مرجعهاش، واستدرج (غادة) اللي هي أصلا عاوزاه لحد ما قدر يجبها شقته، وهناك غدروا بيها وربطوها وخدوا منها الدهب، ولما عرفت انه كمين صارحتهم من غيظها وقالت ده دهب صيني وانا اتنصب عليا زيكم وعملت كدا عشان يتنصب عليكي زيي بالظبط، ومن قهرة (نسرين) قـ,ـتلت (غادة) واتفاجئ جوزها بأنها قـ,ـتلت صاحبتها قدام عنيه، سابها من الصدمة وجري وراح بلغ عنها عشان يبرأ نفسه من التهمة ويقول انه معملش حاجة، ومسكت الشرطة (نسرين) في القضية دي واتعرف الموضوع والدنيا اتقلبت. ولما اتاخدت شهادتي حكيت كل حاجة، وقتها كان الظابط مبتسم وقالي في آخر الكلام (انتي بنت حلال عشان كدا ربنا نجاكي من وسطهم) ولأول مرة حسيت إن اتجبر بخاطري أوي في القصة دي. أنا اتأذيت ومع ذلك اعتزلت اللي أذاني لأني فعلا مكنتش قادرة أخد حقي، ولما اتعرض عليا أكسب فلوس بطريقة حرام برضه اعتزلت الموضوع تماما، وسبحان الله أخرج انا من بينهم ويقعوا التلاتة في بعض، واحدة تقتـ,ـل وواحدة تتقتـ,ـل وواحد يتورط، والوحيد اللي نجى هو اللي بيتقال عليه عبيط عشان بيتقي الله في حياته، ولو كنت على يقين اني تقوى الله بيطلعك من أي مصيبة فانا بقيت في قمة اليقين في قول ربنا اللي بيقول (ومن يتق الله يجعل له مخرجًا) تمت